Cúmprese o requisito de carencia de rendas cando a persoa solicitante ou beneficiaria do subsidio por desemprego careza de rendas de calquera natureza superiores, en cómputo mensual, ao 75 por cento do salario mínimo interprofesional, excluída a parte proporcional de dúas pagas extraordinarias.

Os requisitos de carencia de rendas e, no seu caso, de existencia de responsabilidades familiares, deberán cumprirse no momento do feito causante e, ademais, no da solicitude do subsidio, así como no momento da solicitude das súas prórrogas ou continuacións e durante a percepción de todas as modalidades do subsidio.

Para considerar se se cumpren os requisitos de carencia de rendas e, no seu caso, de responsabilidades familiares, consideraranse como rendas ou ingresos computables:

Os bens, dereitos ou rendementos derivados do traballo, do capital mobiliario ou inmobiliario, das actividades económicas e os de natureza prestacional, excepto as asignacións da Seguridade Social por fillo ou filla a cargo e salvo o importe das cotas destinadas ao financiamento do convenio especial coa Administración da Seguridade Social.

Tamén se considerarán rendas as plusvalías ou ganancias patrimoniais, así como os rendementos que poidan deducirse do montante económico do patrimonio, aplicando ao seu valor o cento por cento do tipo de xuro legal do diñeirovixente, coa excepción da vivenda habitual da persoa traballadora e dos bens cuxos rendementos xa fosen tidas en conta.

As rendas téñense en conta polo seu importe íntegro ou bruto. O rendemento que procede das actividades empresariais, profesionais, agrícolas, gandeiras ou artísticas, computarase pola diferenza entre os ingresos e os gastos necesarios para a súa obtención.

Non se considerarán rendas ou ingresos computables:

As asignacións da Seguridade Social por fillo ou filla a cargo

O importe das cotas destinadas ao financiamento do convenio especial coa Administración da Seguridade Social.

O importe correspondente á indemnización legal que corresponda pola extinción do contrato de traballo, con independencia de que se pague dunha soa vez ou de forma periódica.

O importe das percepcións económicas obtidas pola persoa solicitante ou beneficiaria ou por calquera outro membro da unidade familiar:

• por asistencia a accións de formación profesional ou no traballo ou
• para realizar prácticas académicas externas que formen parte do plan de estudos.

As rendas do traballo e as prestacións públicas percibidas pola persoa solicitante que non se manteñan na data da solicitude.